هل فعلا احنا جيل فاشل

هل نحن فعلا جيل فاشل ؟
رأيي الشخصي في الموضوع

أنا شايف اننا مش جيل فاشل .. لكن احنا جيل بندفع ثمن اخطاء الأجيال السابقة
احنا جيل مش بيتعلم صح و مطالب في الآخر انه يبقي عالم
احنا جيل محروم من ممارسة السياسة و مطالب ان يشارك في كل الأحداث
من سبقونا اضاعوا القدس و طالبونا باستردادها
من سبقونا افسدوا التعليم و طالبونا باصلاحه
من سبقونا نشروا الظلم و طالبونا بالعدل
من سبقونا قتلوا الحلم و طالبونا بالحلم
من سبقونا علمونا السلبية و طالبونا بالايجابية
احنا جيل توفرت له كل سبل الفساد و ابتعدت عنه كل سبل الاصلاح ( بفعل فاعل)
نحن جيل مطالب باصلاح أخطاء من سبقونا بالاضافة لاصلاح أخطائه
نحن جيل مظلوم
و مع ذلك كله فـ أنا أري أننا من أفضل الأجيال
و نحارب في كل الاتجاهاات
و ان كان هناك قلة ممن يطفون علي السطح
و يسيئون لسمعة جيلنا
فتلك القلة موجودة في كل الأجيال
********
ياريت أعرف رأيكم و نتناقش في الموضوع

فين الردود يا شباب

احنا جيل توفرت له كل سبل الفساد و ابتعدت عنه كل سبل الاصلاح ( بفعل فاعل)

و مع ذلك كله فـ أنا أري أننا من أفضل الأجيال

الموضوع جميل اوى اوى و كلامك تقريبا كلو صح
بس انا الجملتين دول ضايقونى شويه
يعنى مش نازلنلى من زور
ههههههههههههه
الجمله الاولى الى هى اتوفرت كل سبل الفساد و الهبل ده
معلش انا بقولك لا
احنا حاليا الدين انتشر بطريقه رهيبه
اكتر من زمان
يعنى زمان كان الفساد منتشر اكتر من دلوقتى
دلوقتى فى قنوات دينيه رائعه و شيوخ جامدين جدا جدا
و بعدين مافيش حاجه اسمها انترش الفساد و ابتعدت سبل الاصلاح
الى عايز يبقى كويس هيبقى كويس حته لو فساد النيا كلو حوليه
المسئله دى بتبقى بالانسان نفسو نيتو ايه
دى اول جمله
تانى جمله الى هى انت شايف ان احنا من افضل الاجيال
افضل الاجيال ازاى حضرتك يعنى؟؟
هو لو جيت على حتت الاهلى اه ده افضل الاجيال فى النادى الاهلى طبعا
هههههههههههههههههههههههههههههههه
لكن بعد كده بقه ؟ افضل الاجيال ازاى ؟ ؟؟
جيل هيفا و شاكيرا ؟؟؟
يابنى الشباب دلوقتى ماعندوش طموح انو يعمل حاجه
الشاب دلوقتى كل تفكيرو ايه
البنات يصاحب كام بنت
و يا دوب يدورلو على شغلانه تكفيه الاكل و الشرب و خلاص على كده
كده يبقى مبسوط و الحمد لله لقى الى هو عايزو
خلاص مافيش طموح عند الشباب

و للاسف يا وان مان
دى مش قله
لا بالعكس دى الااغلبيه العظمه

و ميرسى ليك على الموضوع المهم جدا جدا ده
تحياتى
(لازم فى الاخر اعملى منظر و اقولك تحياتى )
ههههههههههههههههههههههههه

انا بقول (توفرت كل اسباب الفساد) مش بقول ان الدين مش منتشر
زى ايه الاسباب اولا الفضائيات مثلا العربيه والاجنبيه
النت مثلا بالجانب المظلم بتاعه
الاختلاط فى الجامعات والمدارس
وغيره وغيره
الجمله التانيه انا اقصد افضل الاجيال فى القرن الاخير
يعنى احنا احسن من جيل السبعنات البيسموه (فتره الانفتاح) والنا بسميه جيل (البكينى )
وكلنا بنشوف الافلام بتاعت زمان واحنا احسن من جيل التالتنات(بتاع نجيب الرحانى)
كان الواحد بياخد الاعداديه ويتعين مدير مدرسه
وبعدين انتى بتناقدى نفسك فى الجمله الاوله قولتى الدين انتشر والشيوخ (الجمدين جدا جدا )
والشباب بقا عارف ربنا
ورجعتى بعد سطرين بضبط قولتى جيل شاكيرا وهيفاء

وبعدين انتى بتناقدى نفسك فى الجمله الاوله قولتى الدين انتشر والشيوخ (الجمدين جدا جدا )
والشباب بقا عارف ربنا
ورجعتى بعد سطرين بضبط قولتى جيل شاكيرا وهيفاء


انت شكلك كده مافهمتش كلامى
او مش عايز تفهمو

انا اولتلك الدين انتشر لانك بتقول( احنا جيل توفرت له كل سبل الفساد و ابتعدت عنه كل سبل الاصلاح ( بفعل فاعل)))

فانا بقولك لا مابتعدتش عنو سبل الاصلاح ولا حاجه سبل الاصلاح بقت موجوده اكتر من الاول بكتير
هو بس الى عايز يبقى كويس هيبقى كويس

وبعد كده انت بتقول ان احنا من افضل الاجيال
فانا بقولك لا طبعا احنا مش من افضل الاجيال
لان الشباب دلوقتى مابقاش فى دماغو حاجه
ماقولتلكش زى منتا بتقول ((والشباب بقا عارف ربنا))


فا انا مش بناقض نفسى ولا حاجه
و ميرسى اوى
ده بس كان توضيح مش اكتر

بص يا عم حماده ......انا هجيبلك من الاخر

احنا مش جيل فاشل ...........احنا جيل تااايه

تايهين بين ايه صح وايه غلط.......بين احنا عايزين ايه واهالينا عايزه ايه........بين ايه حلال وايه حرام

يعنى مثلا لو عايز تعرف حاجه فى الدين .......افتح اى قناه من القنوات الدينيه هتلاقى كل شيخ له رأى غير التانى .......نرجع نقول نسأل دا الافتاء هم دول اولى الامر

تلاقى دار الافتاء فى مصر بتقولك كلام معين مثلا........لكن لو عرفت ايه رأى الافتاء السعوديه تلاقى كلام تانى خالص........طب احنا نمشى ورا مين؟؟


مثال تانى (وده اكيد حصل عند ناس كتييييير ولسه بيحصل )

لو شاب ياعينى لسه صغنن كده وعندو امل ........وقال انا هدور على شغل.....يعد يدور وبعد ما يدوخ وتطلع عينه ......يجى للناس فى البيت طاير من الفرحه
يا جماعه انا لقيت شغل.....والله ؟ الف مبروك يا حبيبى ..فين بقى ؟.......يقولهم فى كذا كذا ......تلاقى بقه كلو قام فى وشه نعم انت بتستهبل .....ابنى انا يشتغل كدا .......مع انها شغلانه كويسه يعنى وتمام

طبعا الواد يعد يبكى على حاله شويه ويكتئب .......بس عادى اللا مبالاه اللى عند معظم الشباب دلوقتى (ودى من اهم مشاكلنا ).......يومين وينزل يتفسح مع اصحابه ويعمل كل اللى هو عايزه
شويه تلاقى اهله زهقو انت مفيش منك فايده هتفضل صايع وفاشل كده ..........يرجع يفكر تانى وتلاقى يقولك ايه :طب يا جماعه انا عايز فلوس اعمل مشروع.............


وهنا وقعت الكارثه.......... مشروع.. وانا اجيب منين ولو جبت اضيعهم على واحد فاشل( تحس انه مش ابنه مثلا ) واضمن منين ان فلوسى هترجع تانى ......طبعا الواد يا عينى عليه خلاص فقد الامل .....بس اكيد مش هو ده الحل ...........اكيد القصه بتتكرر كتير .......ومعظم الشباب كده دلوقتى .......طبعا فى امثله كتيير بس انا تعبت بصراحه ايدى وجعتنى

المهم يا عم حماده انا عايزه اقولك حاجه من الاخر احنا اللى لازم ناخد قرارنا بنفسنا ......استفتى قلبك زى ما بيقولو وادعى ربنا واتوكل عليه دى اهم حاجه



اكيد لما حد هيعمل حاجه هو عايزها هيعرف يكبرها ويخاف عليها ....... وبجد لو شغلنا نفسنا بحاجه مهمه كل حياتنا هتتغير مش هيبقى فيه الشباب اللى مليين الشوارع دول ولا الكلام الفاضى ولعب العيال اللى بيحصل دلوقتى ده

وساعتها هنبقى احنا صح وهم اللى غلط ........ومحدش هيقدر يقول علينا ربع كلمه بعد كده .........كلام جامد اوى هههههههه


مرسى يا حماده بجد موضوع جااااااامد

فعلا كلام جامد اوى يا انوش وبجد ردك مفيد جدا
انا شكيت ان القصه بتاعت الشاب ده حصلتلك بس انتى بنوته
بس بجد رد مميز ومفيد يمكن اكتر من الموضوع نفسه هههههههههه
وبجد نورتى التبيك

لالالالالالالالالالالالالالالالالالالالالا
احنا احسن جيل بس الظروف هي اللي حكمت بكده
تلاقي الشاب بعد مايطلع عينه وعين اهله في التعليم
يلاقي مكانه محجوز علي كرسي البطاله ويبقي ياولداه
مش عارف يعمل هيشتغل ايه يرد الجميل لاهله ازاي
هيتجوز امتي وازاي طب كان فيدته ايه التعليمبعد كده
طب ما كنت اتعلمت مهنه من البدايه وريحت نفسي
ووفرت المصاريف وتعب اهلي بعد كده لازم يتقال اننا جيل فاشل
احنا جيل النت والفضائيات وده يميزنا عن اللي قبلنابس والله العيب مش فينا
الله اعلم العيب مش فينا ودور كده العيب من مين واذا عرفت العيب من مين
ابقي تعالي عثد قبري وقولي
وشكرا يا حماده علي موضوعك
مع انك قلبت المواجع
سلام

ههههههههه لا يا خفه مش حصلتلى ولا حتى حد من اخواتى الحمد لله بس تقدر تقول كده سمعتها كتير .........وبعدين اتفرج على اى فلم عربى هتلاقيها هههههههه

وبعدين انا قلت ارفه شويه شايفاكو افشين كده وبتكلمو جد اوى قلت ارخم انا غلطانه

بتتشطرو عليا ماشى